时差之徵陌连锁

版权声明：转载时请以超链接形式标明文章原始出处和作者信息及本声明
http://momowie.blogbus.com/logs/46290611.html

继续听写...

94年《末世财神》，某人不愧是预言家（青松觀派籌變抽籤 千人爭龕位大混亂），当然如果将香港替换成上海，都几贴切...有心人士不妨储多几个灵位以备荒年...

（之前讲紧股票…）係唔係好恐怖，你仲够唔够胆赌，梗係要赌，因为而家我哋一定要把握每一个机会搵钱，唔係揾钱，直情要把握每一个机会..发达，因为而家嘅香港你唔发达，你就要瞓街。

点解？因为而家我哋嘅楼价一万蚊一呎，呢个係官府承认嘅，所以压抑楼价喇，而家压抑咗喇...压抑之前就一万零二十蚊一呎...而家一万蚊…係..真冇得顶...

好咯你要瞓觉了喎...你想搵个三百呎嘅楼，唔好太大喇，三百呎嘅楼咁三百万喇，有冇三百万嗱？冇？瞓街！...有冇计错数，一万蚊一呎，三百呎咪三百万喇，係咪？….（对观众）未读过书啊你哋，计数呢D...我话畀大家听，唔係。因为当你储到首期嘅时候就唔係啊...好，我就当你係三百万好了，如果你买一趸三百万嘅楼而家，你首期起码要畀一百万现金出来啊，在座有边位有一百万现金嘅拍一拍手...

（零星掌声，随之笑声四起...）开灯！开灯！...再拍一次请你...冇嘈冇嘈...再拍一次！...（灯亮）...呢D朋友一定要认识吓...果日果度有一个人拍咗，我同佢做咗，而家真係莫逆之交啊...係边度係边度...拍多次...咪...熄灯熄灯...熄灯熄灯...（灯暗）...冇畀人见到，好危险...有冇带来啊最紧要，有冇带来？…

大概得一两位啫，全场二千几人得一两位...咁其他D人你点买楼嘞？…我觉得都得噶...其他D咪，如果你有趸楼咪按咗趸楼或者卖咗趸楼咁样咯，係咪先，係咪先？...OK，咁即係话嘞，如果而家你有趸楼，你首先就要有另一趸楼...咁你另外嗰趸楼点嚟啊？因为你有另一趸楼啊...咁你第一趸楼点嚟嘞？唔知噶，宇宙点嚟啊？...爆出来啰，大爆炸你冇听过咩？...以后你咪同外母讲...我即係有趸楼喇冇烦喇爆出嚟喇…

真係，因为人类嘅智慧而家係唔能够明白人类点样可以得到第一趸楼...但係好彩我哋有牛顿，牛顿第八定律话咗畀我哋听，大家记住啊，好紧要，呢个定律，即係：...有楼有楼，冇楼冇楼，有楼可以变冇楼，冇楼就永世都冇楼喇！...记住啊，就嚟会考考呢样嘢，OK?

一万蚊一呎楼，你知唔知道港大校长黄金茂（音译）啊...原本个校长合约嘞，下年就到期啊喇…佢原本諗住话，见证埋97先至返番澳洲喇，咁样嘅...而家唔得喇，佢话，下年校长合约一到期佢就要走喇…点解啊？因为佢冇钱买香港D楼，佢买唔起...校长都要瞓街，咁以后点劝D学生读书嘞...（扮学生：）得喇，校长，得喇得喇，书中自有黄金屋，黄金屋係书里面有，现实係冇啊嘛，呢D你最清楚啊喇...啊，校长，我阿妈叫我带张毡畀你啊，条街冻啊...

一万蚊一呎楼，不过好彩政府就话压抑楼价，唔单只政府喇，仲有好多好多专家都话，用好多唔同嘅方法压抑楼价喇要…好喇，我觉得，咁多种方法里面嘞，最荒谬嘅一种嘞即係话，要政府拨出大量、好多土地出嚟，当市面上多咗好多土地嘞，楼价自然会回落嘅喇…

我觉得好荒谬呢样嘢，即係原来香港仲有好多土地啫喎...我真係试过揸住部车氹氹返，围住香港环游一个圈...冇时差嘅啵，唔哂校表嘅啵...行到海边，即係海嚟嘅，浮浮下，唔起得楼嘅啵...啊，唔係，可能…可能政府收埋咗D地啊... 響政府廉署七楼？...啊唔係，可能根本就係订咗，係大陆订咗未运落嚟...抑或係，我哋香港真係有D地只有政府先知道係边，係我哋唔知噶...我都怀疑咗好耐喇...呢叫鬼~地~...唔係，你諗真啊，我哋叫尖沙咀，尖沙咀係咀嚟啫，咁尖沙牙、尖沙脷嘞？...湾仔又係仔嚟嘅嘛，咁湾老豆、湾老母嘞？...可能香港真係仲有好多新大陆噶...我觉得陈方安生就唔应该跟老公姓陈喇，佢应该叫自己作哥伦布.方安生...

啊，即係你哋信政府又好信D专家又好，佢哋帮唔帮到你嘞我唔知...但係各位，如果你信细佬，细佬即刻醒一单正盘畀你，包你话又平又靓又抵住，OK？...真係报纸度卖哂广告喇...呢单正盘，首期只需要畀两成，然后每个月只需要畀二百八十四蚊，供足四年，你就可以係香港——唔係大陆、唔係加拿大——係香港嘅沙田，一个环境清幽、风水灵秀嘅地方，拥有你自己个人嘅物业...呢个物业唔大唔细，啱啱足够.安放阁下嘅.骨灰灵位...

大家拍哂手掌，咪有lawyer讲到，梗係订哂喇...啊喂，你未订快D订啊，因为张报纸写住，凡五十五岁以上之用家，有特惠优待...唔係啊，既然有得用家，换言之即係仲有炒家喇...灵位都有人炒，咁唔怪之得患咗绝症嘅人生存意志咁强啊...（扮绝症患者：）唉，我几大都冇死住..（咳喘）..几大等个价回返D先...嚟，电多嘢电多嘢（作被电击状）...

不过大家放心，我相信政府好快嘞又会提出，政府将会推出大量嘅灵位...大家即管放心去死....啊死咗就有业主做喇...由大家嘅笑声里面，我听得出一种好苍凉嘅感觉...但係，我唔会令大家好苍凉咁离开，好苍凉咁卡拉OK直落嘅...我话畀大家听，其实而家就係香港最灿烂嘅时刻，而家就係我哋做富豪最好嘅时刻喇...你諗下，而家一趸五百呎嘅楼就好值五百万，一趸五百万嘅楼就属于豪~宅~——换言之你只需要拥有一趸五百呎嘅楼，阁下即係富豪，你就可以对你心抱讲…（扮家婆：）你检点D好喎...家吓你嫁入豪门...人坐你又坐，一齐坐够唔够位坐啊...

係咪？你諗一样嘢，阿喂，一趸五百呎嘅楼嘞，差唔多已经係最细嘅楼嚟嘅喇，如果五百呎你都买唔起，你差唔多注定呢一世都要瞓街喇，世界上有边个社会好似香港咁犀利嘅——你一係做富豪，一係就瞓街！...几励志嘞...係唔係？

但係，我觉得，大家当然唔哂忧虑瞓街，因为你有常识嘅，你识得諗：喂，快D买喇，如果唔係，迟D连五百呎嘅富豪都做唔到要做三百呎嘅富豪，再迟D就要做一百呎嘅富豪，即时搞鸡尾酒会就要響部lift度搞就唔有意思...哈哈

而我勒，旧年就好醒目将我手里所有积蓄響沙田买咗二十个风水灵位，因为我知道唔使冇几耐嘞，只要有一个灵位你都係富豪啊...我想象到，冇几耐我就会继风扇刘之后畀人称为灵位黄...而家我已经成日係屋企练习乜姿势...（举手）...竞投灵位啊...我已经想象到，唔使冇几耐我就会同李嘉诚一齐打高尔夫球吓，一边響度讨论果D灵位嘅内部认购问题...哇，诚哥你要啊，诚哥你要，我老母唔爱我 都畀埋你，然后诚哥又会搭住我膊头好亲切咁劝我：唉，世侄，即係出嚟识女明星呢D嘢，唔使吓吓送个灵位畀佢咁重手嘅...

P.S.港人习惯说的[尺]是英呎，即12吋，1吋=2.54CM, 所以1呎=12 X 2.54 = 30.48CM；1平方英呎=0.0929平方米，基本上11呎相当于1平方米——1万蚊/呎=10+万蚊/平方米